Ëngjëllush Bregu, mësuesi i akuzuar për pedofili, nuk ishte rikthyer në arsim muajt e fundit, por para tre-katër vitesh. Kjo është pohuar nga vetë Bregu, i cili ka konfirmuar se ka nisur punën në shkurt 2018, edhe pse në portal kishte aplikuar në 2017.
Në emisionin “Shqipëria Live”, Bregu tha se kishte vetëm katër ditë që jepte mësim te shkolla “22 Tetori”.
“Më pritën mirë. Pasi ra numri i nxënësve në shkollën ku jepja mësim më parë, u detyruan që dy mësues të dilnin pa punë. Në bazë të portalit nuk arrita që të mbyllja dokumentet për të drejtën e punës. Në 2017 kam hyrë në portal dhe kam pritur. Vendi i punës është hapur më 1 shkurt të 2018.
Kam dorëzuar dosjen me të gjitha dokumentet, dëshminë e penalitetit, vlerësimin e komitetit të prindërve të asaj shkolle, vlerësimin e psikologut. Katër ditë unë u ndjeva një çik ngushtë se nuk kisha lëndën time matematikë-fizikë.
Në shkollë pritja ka qenë e mirë, përveç drejtoreshës, e cila mendoi se kisha falsifikuar dokumentet.
Kur kanë pyetur nxënësit për mua, një fëmijë nuk di si të veprojë, si është shikimi i çuditshëm. Kam bërë vetëm 1 orë mësimin me secilën klasë, nuk kisha si t’i shihja në mënyrë të çuditshme”, ka treguar ai.
I pyetur në lidhje me akuzat për ngacmim seksual, ai ka mohuar të ketë ndodhur diçka e tillë.
“Kam përqafuar një nxënës, mësuesi ka për detyrë të ruaj nxënësit. Çuditem të më vendoset një epitet i tillë “pedofil”, është akuzë shumë e rëndë. Është një inskenim, fakte nuk ka. Një vit para se të ndodhte kjo jam ndarë nga gruaja, kam pasur probleme me të. I vetmi fakt është se i kam hedhur krahun. E vuajta atë dënim. Në ndërgjegjen time jam i pastër se nuk e kam bërë atë gjë”, tha Bregu.
