Një punonjës policie ka mbetur i plagosur në Itali, pasi ka tentuar që të ndalojë grabitjen e një farmacie, pavarësisht se ishte jashtë orarit zyrtar të punës.
Maurizio Sabbatino, u plagos me thikë nga një prej autorëve të grabitjes, një 16-vjeçar, i cili më pas u vetëdorëzua në komisariatin e policisë në Torino.
Ai ka deklaruar se ishte autor i plagosjes së karabinierit, ndërkohë që vijon puna për kapjen e bashkëpunëtorit të tij.
Punonjësi i policisë u operua natën në spitalin San Giovanni Bosco, ku u transportua për dëmtime në mëlçi dhe mushkëri. Ndërhyrja ka rezultuar e suksesshme dhe karabinieri për momentin është jashtë rrezikut për jetën.
“Ky lajm na mbush me trishtim”, komentoi presidenti i Rajonit të Piemontes, Alberto Cirio. “Ne jemi pranë familjes së karabinierit, i cili edhe pse ishte jashtë detyrës, nuk hezitoi të vinte në rrezik jetën për të parandaluar një grabitje. Shpresojmë me gjithë zemër që gjendja e tij të përmirësohet”.
