Kryeministri Edi Rama dhe biznesmeni Behgjet Pacolli ishin të pranishëm sot në një ceremoni për atë që Kreu i Qeverisë e prezantoi si nisja e punës për ndërtimin e aeroportit të Vlorës.
Por ajo çka tërhoqi vëmendjen ishin lavdet dhe elozhet që Rama dhe Pacolli i thurrën njëri-tjetrit, pak a shumë një skenë e ngjashme me një skeç të estradës së Fierit, “a doni më për Behlulin”.
“Ky është kryeministri që unë preferoj, një kryeministër me energji të paparë, një kryeministër me dashuri dhe dëshirë shumë të madhe për të ndryshuar Shqipërinë. Kryeministër ja keni ndalë kësaj pune, ju përgëzoj në rrugëtimin tuaj, jeni duke punuar për qytetarët më të mirë dhe ne kemi të drejtë të kemi të ardhme më të mirë për fëmijët tanë, për vetveten dhe për gjithë miqtë tanë. Na qoftë e mbarë fillimi i kësaj vepre madhështore”, tha Pacolli në fjalën e tij.
Dhe si për të mos mbetur pas, rradhën e lavdeve e merr Rama.
“Vlora ka historinë e saj sa i përket transportit ajror. Në Vlorë është ndërtuar shkolla e parë e aviacionit në Shqipëri. Ndërsa këtu ku jemi sot është ndërtuar Aerodromi. Sot fillojmë një projekt të ri me një mik të çmuar tonin. Një personalitet i cili me veprat e tij e ka çuar emrin në shumë vende të botës.
Një njeri të cilin kam nderin ta konsideroj dhe mikun tim, Bacën Behgjet, që e falenderoj shumë në përfshirjën në këtë aventurë të përbashkët, sepse për hir të vërtetës, kjo për të ardhur në këtë ditë ka qenë më e vështira. Për dreq qëlloi që të ishte një punë që të bëhet në Vlorë dhe mua mu desh të përballoj padurimin e vlonjatëve, që dihet se janë kampionët e padurimit në të gjithë universin shqiptar. E për dreq na u fut në mes pastaj pandemia që më së shumti goditi sektorin e aviacionit. Më në fund u bë e mundur tëe gjendet forca e duhur për ta çuar përpara këtë projekt të madh që është forca e Behgjet Pacollit”, u shpreh Rama.
