Nga BoldNews.al
Gjykata e Tiranës shpalli fajtor për “Shpifje” redaksinë e “Boldnews.al”, pas një padie të Mirel Mërtirit, personazhit të konsideruar si “njeriu-hije” i aferës së inceneratorëve.
Sipas Gjykatës, redaksia ka “shpifur”, duke cituar burime mediatike në Zimbabve, të cilat e përfshinin personazhin “Ilir Dedja”, por me foton e Mirel Mërtirit, në një “aferë 60 milionë USD” për pajisjet mjekësore në vendin afrikan.
Media e Zimbabves, i shoqëronte raportimet e saj me një foto tepër domethënëse, ku Mirel Mërtiri shfaqej së bashku me disa nga personazhet kyç të asaj afere, të arrestuar nga autoritetet vendase pas shpërthimit të atij skandali.
Megjithëse “Boldnews.al”, iu referua katërcipërisht medias afrikane, gjyqtari i Tiranës, Besnik Hoxha, e konsideroi “shpifje” dhe vendosi dënimin e redaksisë.
Gjyqtari i dha të drejtë asaj që konsiderohet pa asnjë ekuivok si “padi SLAPP” (Të të hedhin në gjyq sepse ke folur).
Dy akademikë amerikanë, në fillim të viteve ’80, publikuan librin “Slapps: Getting Sued For Speaking Out”, dhe në të flitet se si të famshmit, të fuqishmit dhe të pasurit, individë apo korporata, kanë abuzuar me të drejtën për të ngritur padi në gjykatë me synimin e shtyrjes së kritikëve drejt heshtjes.
Padia e Mërtirit ndaj “Boldnews.al” dhe, e pranuar në mënyrë të verbër nga gjyqtari, është saktësisht një SLAPP, një tentativë për të mbyllur gojën e medias të flas për “aferën e inceneratorëve” në Shqipëri.
“Boldnews.al” është ndër të paktat redaksi që raporton në mënyrë periodike mbi “aferën e inceneratorëve”, të cilën e konsideron si aferë kriminale.
“Boldnews.al” i ka rezistuar çdo tentative shantazhi, presioni apo joshjeje për të bërë kompromis me “klanin e inceneratorëve” Zoto-Mërtiri, në dëm të interesit publik.
“Boldnews.al” ka refuzuar me përbuzje “korrierët” qeveritarë, të cilët sugjeronin që të tregohej dashamirësi ose më së paku për të mos e përmendur publikisht “aferën e inceneratorëve”.
Redaksia ka zbuluar dhe raportuar kohë pas kohe përfshirjen e zyrtarëve të lartë në këtë skandal financiar, si edhe lidhjet e “biznesmenëve” me segmente të caktuara mediatike, të cilat janë shndërruar në “aksionerë” të fshehtë apo të dukshëm të thesit qindra milionë euro të inceneratorëve.
“Boldnews.al” nuk ka raportuar asnjëherë për çështje personale të “biznesmenëve” Zoto-Mërtiri, as për familjet e tyre. Nuk ka asnjë raportim, i cili të mos jetë i mbështetur në dokumenta zyrtarë dhe qeveritarë.
Ndaj, shpifje nuk ka, pavarësisht se gjyqtari i Tiranës vendosi ndryshe, ndoshta nën joshjen e “klanit të inceneratorëve”
“Boldnews.al” u dënua jo sepse “shpifi”. Por, sepse raportoi, sepse foli për “aferën e inceneratorëve”.
Historia e re e inceneratorëve në Shqipëri, mund të përshkruhet me shprehjen e shkrimtarit italian, Roberto Saviano: “Shteti është ulur në një tavolinë me mafian”.
Ka vetëm një ndryshim mes mafias në Itali dhe zhvillimeve në Shqipëri- në Shqipëri nuk ka vrasje mafioze. Nuk janë të nevojshme, pasi nuk ekziston gara e përgjakshme mes grupeve rivale të interesit për t’iu afruar vendimmarrjes së Qeverisë.
Në Shqipëri, fiton ai që ka lidhjet me Qeverinë. Nuk ka nevojë për presion, as për luftë për kontroll territoresh. Mafia e plehrave në Shqipëri është ai grup që cakton qeveria.
Dhe, ky grup, nuk toleron askënd të tregojë të vërtetën e skandalit. Edhe kur i nxjerr fytyrën e vërtetë, siç ndodhi me skandalin në Zimbabve.
Lexo edhe:
