Presidenti ukrainas, Volodymyr Zelensky tha se një grup ukrainas dhe rus po planifikojnë të kryejnë një grusht shteti kundër tij javën e ardhshme.
Duke folur në një konferencë shtypi në Kiev të premten, Presidenti tha se kishte marrë informacione nga sherbimet sekrete se grushti i shtetit është planifikuar për në datat 1-2 Dhjetor.
“Ne kemi sfida, jo vetëm nga një përshkallëzim i mundshëm nga Federata Ruse, por edhe të brendshme. Kam informacione që po përgatitej një grusht shteti në vendin tonë me 1 dhe 2 dhjetor”, u shpreh presidenti ukrainas.
Zelensky tha se kishte audio të komplotuesve ukrainas dhe rusë që diskutonin planin. Presidenti i Ukrainës tha se komplotistët e supozuar përmendën gjithashtu emrin e një prej njerëzve më të pasur të Ukrainës, Rinat Akhmetov.
Ndërkohë, tensionet mes Moskës dhe Kievit janë rritur ndjeshëm pas raportimeve të Shteteve të Bashkuara për një sulm të mundshëm ushtarak të Rusisë ndaj Ukrainës.
