Janë mbyllur 45 minutat e para të 6 sfidave të vlefshme për raundin e 5-të të grupeve të Champions League.
Supersfida Atletico Madrid-Milan është mbyllur në barazim pa gola. Kujtojmë që fitorja është detyrim për kuqezinjtë edhe pse shanset për një kualifikim për në raundin tjetër janë të vogla për skuadrën e Piolit.
Me të njëjtin rezultat 0-0 është mbyllur edhe pjesa e parë e supersfidës Man.City-PSG. Skuadrat bëjnë pjesë në grupin A dhe ndahen vetëm një pikë me njëra tjetrën dhe kjo ndeshje vendos për kreun.
Në Grupin C, Sporting Lisbona kryeson 2-0 ndaj Dortmund. Një sfidë direkte kjo për vendin e dytë në grup teksa Ajax është e shkëputur në kuotën e 15 pikëve. Me këtë rezultat, portugezët ngjiten në kuotën e 9-pikëve ndërsa gjermanët zbresin në vendin e tretë me 6 pikë.
Ndërkohë Real Madrid kryeson 2-0 në transfertë ndaj Sheriff Tiraspol me golat e David Alaba dhe Kroos.
