Lidhjet me Cosa Nostra-n, ish-sulmuesi i kombëtares italiane dënohet me 3 vite e 6 muaj burgim

Fabrizio Miccoli. Foto nga Getty Images

Një histori e vjetër pothuajse një dhjetëvjeçar do t’i kushtojë rëndë Fabrizio Miccolit. Ish-sulmuesi i Palermo, Juventus dhe Perugia, që ka veshur edhe fanellën e Kombëtares italiane, u dënua në mënyrë të prerë nga Gjykata e Apelit italiane me 3 vjet dhe 6 muaj heqje lirie me akuzën e përfshirjes në veprime kriminale të tipit mafioz.

Sipas Prokurorisë, Miccoli, atëherë ende në aktivitet, në tentativë për të marrë një borxh prej 12 mijë eurosh që i kishte dhënë një pronari diskoteke iu drejtua një mikut të tij, siç ai e cilëson, por që rezulton të jetë Mauro Lauricella, djali i bosit mafioz Antonino, një nga figurat e spikatura të Cosa Nostra në Sicili.

Miccoli ka deklaruar se ai nuk ishte në dijeni për identitetin e vërtetë të Lauricella, i cili për zhvatjen ndaj pronarit të diskotekës ishte dënuar më parë me 7 vite burg.

LEXO EDHE  Cikalleshi, lojtari më i mirë i muajit në kampionatin turk

Ish-futbollisti që erdhi edhe në Shqipëri për një periudhë, ku mori statusin e zëvendëstrajnerit të Dinamos nën drejtimin e shkurtër të Francesco Moriero, edhe pse do të kërkojë një ndryshim të masës, me siguri do te kaloje një periudhë në qeli.

Nuk është hera e parë që ai përfshihet në skandale që kanë të bëjnë me miqësitë tij të dyshimta me eksponentë mafiozë. Vite më parë, një telefonatë e përgjuar tregonte sesi ai tallej me disa prej tyre për vdekjen e gjykatësit Giovanni Falcone nga Cosa Nostra.