Autoritetet shëndetësore në Kosovë njoftuan këtë të Shtunë për 1 humbje jete dhe 7 raste të reja me koronavirus, nga 1.546 testime.
Sipas njoftimit, nga COVID-19 janë shëruar edhe 34 persona, ndërsa raste aktive janë 352.
Më herët, Shërbimi Spitalor Klinik dhe Universitar i Kosovës njoftoi se “pas një kohe të gjatë që nga fillimi i pandemisë në mjekimin intensiv të QKUK-së dhe spitaleve të përgjithshme, nuk ka pacientë me COVID-19”.
“Në tërë Shërbimin Spitalor Klinik dhe Universitar të Kosovës në trajtim mjekësor janë 32 pacientë, prej tyre 12 të konfirmuar me COVID-19 dhe 20 të tjerë post-covid. Me oksigjeno-terapi janë 12 pacientë”, thuhet më tej në njoftim.
Prej shpërthimit të pandemisë, në Mars të vitit 2020, autoritetet shëndetësore në Kosovë kanë regjistruar rreth 170.000 raste të infektimit.
Sa i takon vaksinimit kundër koronavirusit, në 24 orët paraprake janë administruar 2.022 doza të vaksinës. Deri më 20 nëntor, mbi 755.000 qytetarë janë vaksinuar me dozën e dytë. Prej fillimit të vaksinimit, në muajin Mars, në të gjitha qytetet e Kosovës janë dhënë mbi 1.600.000 doza të vaksinës.
