Banorët e Shkozës janë mbledhur këtë të Shtunë për të kundërshtuar përmes një deklarate atë që konsiderojnë edhe ndryshimin e gjurmës për projektin e Unazës së Madhe.
Ata thonë se gjurma e vjetër e projektit prekte 9 banesa ndërsa gjurma e re prek 40 banesa ku jetojnë 60 familje.
Ata deklarojnë se në momentin që kanë blerë truallin dhe kanë ndërtuar i janë drejtuar bashkisë së Tiranës për të pyetur nëse mund të ndërtonin apo jo në pjesën ku aktualisht ata denoncojnë se është zhvendosur gjurma e projektit të Unazës së Madhe e prej tyre kanë marrë një miratim që mund të ndërtonin ku aktualisht kishin banesat.
Por ata kanë parë se pranë banesave të tyre po bëhen matje dhe thonë se ky ndryshim i gjurmës së projektit rrezikon shembjen e banesave të tyre.
Kërkojnë të shpresojnë që Edi Rama të dëgjojë thirrjet e tyre e të kthehet gjurma e projektit aty ku ishte e të mos ketë një prekje kaq të madhe.
“I drejtohemi kryeministrit Edi Rama, ambasadores së SHBA-së Yuri Kim, SPAK, Ambasadorit të BE-së dhe të gjithë organeve ligjzbatuese. Shqetësimi jonë është devijimi i segmentit të unazës, loti 4 nga projekti Adil Çarçani në projektin e ri që ka bërë ARRSH. Tek kjo toka bosh është 90% të saj është e pashfrytëzuar. Është lënë qëllimisht se do të ndërtohej Unaza e Madhe e Tiranës. Por kjo është devijuar 60 metra në lindje. Gjurma e vjetër prekte 9 banesa nga të cilat 3 ishin të braktisura. Ndërkohë me projektin e ri preken 40 ndërtesa me 60 familje pasi janë ndërtesa dy katëshe”, thanë banorët.
Banorët shprehen të vendosur se do të vijojnë protestat.
