Punëtorët e rafinerisë së naftës në Ballsh nuk gjejnë qetësi. Hyrja e disa mjeteve të paidentifikuara brenda mjediseve të Uzinës, i ka alarmuar naftëtarët të cilët të Premten dolëm në protestë.
Dyshojnë se rafineria po demontohet, ndërsa paralajmërojnë se do ta mbrojnë objektim me trupat e tyre.
Para Uzinës e cila qëndron e mbyllur dhe pa punë, paralajmëruan përshkallëzim të protestave nëse shteti nuk merr pasa të menjëhershme.
Pagën 30 mijë lekë për 2 vitet e ardhshme të miratuar nga qeveria e konsiderojnë lëmoshë.
Ata iu drejtuan personalisht kryeministrit Edi Rama, duke i kujtuar premtimet e pambajtura.
“U alarmuam nga kotenierët që janë futur aty natën. Nuk e dimë çfarë bëhet. Nga kjo u grumbulluam sot. Nuk duhet ti shkojë në mend qeverisë të bëjë demontimin e uzinës, e mbrojtëm me gjak në ’97”, tha një prej protestuesve.
“Kontenierët janë futur brenda, do të thotë se uzina po shkon për skrap. Kështu punohet në Shqipëri me grabitje dhe mafie. Nëse kjo shkon për skrap kemi dy vjet pa marrë pagat, të na likujdojnë neve të parët dhe pastaj të vazhdojë puna. Në të kundërt këtu nuk ka për të kaluar as Zot jo më njeri apo kontenier”, shtoi një tjetër.
“Jam vetë i pestë, me 300 mijë lekë si t’ia dal”, u shpreh një naftëtar.
“Hallet na kanë filluar nga 2013, këto paga kërkojmë.Janë futur kamionë brenda. prandaj jemi mbledhur. Do ruajme me turne. Rama të shmangë konfliktin fizik. Unë që kam më pak, kam mbi 7 milion lekë nga gjyqi. Rama i ka në kasafortë lekët tona, të bashkohemi dhe t’ja marrim. Jemi kundër demontimit të uzinës, në të kundërt Ballshi mbaroi. Rrugën na e mori”, deklaroi për gazetarët një protestues.
