Partia Demokratike kërkon dorëheqjen e Bora Muzhaqit nga posti i Ministres për Fëmijët.
Kjo e fundit, pas ngjarjes në Fier, u pyet nga gazetarët “çfarë masash konkrete janë marrë në lidhje me rastet e abuzuara”. “Unë jam shumë vonë dhe më duhet të lëviz”, tha Muzhaqi duke anashkaluar interesimin e gazetarëve edhe për projektligjin për krijimin e një regjistri me autorët e krimeve seksuale, të depozituar në Kuvend.
Në një reagim në rrjetet sociale, pas deklaratave të Muzhaqit, deputetja demokrate Ina Zhupa kërkoi dorëheqjen e saj.
“Dy realitete krejt të ndryshme kishte sot në Tiranë. Familjarët e Mateos, të dërrmuar nga dhimbja, që kërkojnë ndihmën e qytetarëve për të firmosur kthimin e dënimit me vdekje dhe Ministrja e Edi Ramës për fëmijët, që shpërfill me buzëqeshje dhimbjen e pamasë për vrasjen makabre të vogëlushit. Bora Muzhaqi ikën pa thënë asnjë fjalë për të, pa treguar aspak dhimbsuri, përulësi dhe përgjegjshmëri për detyrën e saj. Kur të shihni videon, jam e sigurtë se do të revoltoheni njësoj si unë. Dhe nuk e them këtë, sepse unë jam deputete e opozitës, që shoh më të këqijat tek qeveria. Jam e revoltuar si nënë dhe si qytetare, kur shoh Ministren për Fëmijët të na përpalsë në fytyrë VKM-në e detyrave të saj”, shkruan Zhupa.
“Zonja Ministre! Ju sot duhet të jepni dorëheqjen, sepse nuk jeni e denjë të bëni politika për fëmijët tanë! Jeta dhe mirëqenia e një fëmije është çështje shumë më e madhe sesa një VKM. Por ju këtë zonja Ministre nuk mund ta kuptoni, sepse jeni në atë detyrë jo për meritën tuaj, por sepse Edi Ramës i duhet buzëqeshja juaj”, shton ajo.
