Deputeti i Partisë Demokratike, Belind Këlliçi, ka qenë i ftuar në emisionin “Të Paekspozuarit” në MCN TV, ku foli për ngjarjet e fundit në Partinë Demokratike.
Këlliçi dha disa detaje nga mbledhje e djeshme e Lulzim Bashës me kryetarët e degëve, duke shpjeguar se Basha nuk ka patur mbështetje masive prej tyre.
“Në lidhje me mbledhjen e djeshme, nga 71 kryetarë, dje kanë qenë vetëm 51. Njëzetë kryetarë e kanë bojkotuar, tetë e kanë kundërshtuar hapur, nëntë prej tyre kanë qenë pro tij dhe pjesa tjetër ka heshtur”, deklaroi Këlliçi.
Më tej, deputeti foli për Kuvendin e thirru nga delegatët dhe Berisha, duke e konsideruar “Kuvend të mrekullueshëm dhe transparent”.
“Ka patur tentativë për të intimiduar pjesëmarrësit në takim, por disa kryetarë degësh nuk e kanë pranuar kongresin e kryesisë, do të marrin pjesë në atë të datës 11 dhjetor.
Shumica ditën e djeshme është shprehur dje, në dakordësi për 18, por interesante do të jetë se sa njerëz do të mund të sjellin. Është presion i kotë, deri në ditën e Kuvendit.
Ka 7600 delegatë në PD. Nuk besoj se do të ketë 100% pjesëmarrje, por jam i bindur se kuorumi 50+1 do të jetë.
Në Kuvendin e datës 11 do të shihni Kuvend të mrekullueshëm, transparent, mediat do të jenë të ftuara. Është Kuvendi i parë në 30 vjet që thirret nga delegatët dhe meriton të trajtohet me respektin më të madh”, tha Këlliçi.
