Deputeti demokrat Kreshnik Çollaku mendon se konflikti në PD filloi në datën 9 shtator, kur kryetari i partisë, Lulzim Basha, pranoi kërkesën e Shteteve të Bashkuara të Amerikës për të përjashtuar Sali Berishën nga grupi parlamentar.
“Thelbi i asaj që po ndodh në PD është se partia heq imunitetin politik të Berishës përkohësisht derisa të sqarohet problemi që ai ka me DASH. A është vendim i drejtë? Ky është debati.
Në rast se akuzat kanë qenë të natyrës politike, si pretendimi për Kosovën jam i gatshëm ta lë edhe unë mandatin dhe t’i bashkohem. Nëse akuzat janë për nivel të korrupsionit, PD-ja nuk mund të japë imunitet politik për askënd, që nga Berisha, që është lider historik”, tha Çollaku në studion e Ditarit në A2 CNN.
Çollaku tha se reagimi i Berishës pas përjashtimit është më tepër personal ndaj Bashës.
“Në rast se zoti Basha ka qenë i shitur, ka qenë përherë. Nëse e ka ditur para 9 shtatorit që është peng dhe i shitur, na ka një borxh të gjithëve, që na ka bindur që ky është një lider në shkëlqim. Nëse qëndrimi ndryshoi pas 9 shtatorit, ka lidhje me marrëdhëniet personale”, tha ai.
Çollaku tha se ideja për një Kuvend Kombëtar është ende një mundësi shumë e mirë që kushdo t’i thotë të vërtetat njëri-tjetrit. Por sipas tij, data legjitime është vetëm 18 dhjetori.
