Ish-Kryeministri Sali Berisha u shpreh nga Fushë-Kruja se Kuvendi Kombëtar i PD do të mbahet më 11 dhjetor, ndërsa data e caktuar nga peng Kryetari më 18 dhjetor është një anti-Kuvend, që nuk pati kurajo ta bëjë as Ramiz Alia, 30 vjet më parë.
Berisha tha se 4200 firmat e mbledhura janë të depozituara në selinë e Partisë Demokratike, ndërsa statuti i depozituar në Gjykatë nga peng-kryetari në asnjë gërmë të tij nuk thotë që firmat duhet të depozitohen se Kryetari apo Sekretari i Përgjithshëm.
“Ato firma u mblodhën për shkak të atij që e quante Foltoren llum, që e shndërroi PD në një ministri të Edi Ramës. Kjo kohë që na ka mbetur të angazhohemi në një dialog me ata që vijojnë të kenë një simpati për peng kryetarin, por ato s´mund të mbeten peng të një pengu, sepse keni ndenjur 8 vite në opozitë, jo për fajin tuaj, por për fajin e kryetarit.
Me bashkimin tonë, me rikthimin e votës së lirë në të gjitha institucionet e PD, do përmbysim narko-shtetin. E bëri Kryesinë me 38 anëtarë, nga të cilët 60 % e tyre janë të emëruar”, tha Berisha.
