Tetë shqiptarë janë arrestuar nga policia spanjolle si pjesë e një grupi që merrej me pastrim parash dhe kultivim e trafik marijuhane në Valencia dhe rrethina.
Sipas mediave spanjolle, që citojnë burime zyrtare të policisë lokale, tetë të arrestuarit janë të moshave 18-42 vjeç (gjeneralitetet nuk bëhen me dije). Dy prej të arrestuarve raportohet se janë me precedentë të mëparshëm penalë.
Policia sekuestroi në një magazinë bimë narkotike me peshë rreth 250 kg, 4 kg marijuanë të ambalazhuar në vakum, 6500 euro, një automjet dhe materiale për kultivimin dhe përpunimin e drogës.
Plantacionet e drogës ruheshin nga dy persona 18 dhe 19-vjeçarë, të cilët raportohet se jetonin në kushte shumë të pasigurta dhe organizata kriminale u kishte tërhequr pasaportat. Ata tentuan të largoheshin gjatë operacionit policor, por u arrestuan.
