Ish-ministri i Drejtësisë, Ylli Manjani komenton zgjedhjet në Kosovë dhe heq një paralele me Shqipërinë.
Sipas ish-ministrit Kosova voton demokratikisht, ndërsa Shqipëria ecën nga monizmi në monizëm.
“Kosova voton. Pushteti atje ndryshon. Politika lëviz. Kryetarët ikin. Askush nuk e ka me tapi. Kosova voton demokratikisht pa pyetur asnjë ambasador si, kur e përse! Votohet shpesh. Populli realisht vendos. Me votë të bëjnë Kryeministër. Por një vit më pas të heq karriken. Vota ndryshon pushtetin, pa asnjë diskutim! Me votë Kosova na tregon se si ndryshon vendimmarrja në rrugë demokratike. Demokracia nuk njeh as mandate e as afate”, shkruan Manjani në një postim në rrjetet sociale.
“Në Shqipëri….. lëre fare më mirë! Krahasimi është zhgënjyes… Nga monizmi në monizëm. Nga humbja në humbje. Asgjë nuk ndryshon. Votoni ju sa të doni, por hiçgjë ndryshoni. Skeni gjë në dorë. Pse në Kosovë jetoni ju që të ndryshoni pushtetin me votë dhe shpesh?! Ja si zgjedhohet folja “votoj” në shqip: Unë votoj. Ti voton. Ai/Ajo vendos. Ja dhe në shumës, pluralizëm medemek: Ne votojmë. Ju votoni. Ata vendosin”, shton.
“Zgjedhjet janë votime dhe mezi bëhen një herë në katër vjet si kampionati botëror i futbollit. Bahh! I humbe ndeshjet, prit kampionatin tjetër. Ska më ndeshje… Ne jemi medemek stabilokratë, shqipet në Kosovë janë thjesht demokratë! I kam zili demokratët e thjeshtë Kosovarë. Ma çpifin në ektrem stabilokratët në Shqipëri”, e mbyll reagimin ish-ministri.
