Vrasja e 97-ës, ekstradohet nga Anglia kuksiani i dënuar me 8 vite burgim

Një 47-vjeçar nga Kukësi i shpallur në kërkim ndërkombëtar nga autoritetet shqiptare, është ekstraduar drejt Shqipërisë nga Mbretëria e Bashkuar, pas arrestimit atje.

“Nga ZQK Interpol Tirana, falë bashkëpunimit me autoritet e Mbretërisë së Bashkuar, u krye ekstradimi drejt vendit tonë, i shtetasit Dëfrim Iseberi, 47 vjeç. Ky shtetas, është arrestuar nga autoritet policore në Mbretërinë e Bashkuar në zbatim të urdhër-arrestit ndërkombëtar të nxjerrë nga ZQK Interpol Tirana, pasi Gjykata e Apelit Shkodër, në vitin 2016, e ka dënuar me 8 vjet burgim, për veprat penale ‘Vrasje me paramendim’ dhe ‘Armëmbajtje pa leje’.: Ky shtetas më datë 16.10.1997, në Kukës, ka qëlluar me armë zjarri shtetasin D.M., i cili si pasojë e plagëve të marra ka ndërruar jetë”, njofton këtë të Diel policia.

Në vitin 1997, te hotel “Gjallica” në Kukës, ai qëlloi me armë zjarri për vdekje një roje sigurie, i cili disa muaj më pas ndërroi jetë në spital. Dëfrim Iseberi raportohet se pas krimit, po në vitin 1997, arriti të futej ilegalisht në Angli ndërkohë që drejtësia shqiptare e dënoi në mungesë.

LEXO EDHE  “Më rrëmbyen 4 burra”, gjendet 28-vjeçarja e zhdukur. Kishte ikur me të dashurin

Dëfrim Iseberi u arrestua në Londër në vitin 2020. Lidhur me arrestimin e tij raportuan dhe mediat britanike, që shkruanin se megjithëse në kërkim nga drejtësia shqiptare, Dëfrim Iseberi në vitin 2011 kishte postuar një video në YouTube duke luajtur futboll. Nga kjo video policia angleze mundi të përftojë një imazh të ri se si dukej i kërkuari i drejtësisë shqiptare. Iseberi në Angli përdorte një identitet të rremë nën emrin Agim Mema. Megjithëse ishte i kërkuar për vrasje në Shqipëri, Iseberi kishte aplikuar për nënshtetësi britanike madje merrte edhe asistencë sociale si person në nevojë.