Të paktën 68 të burgosur janë vrarë dhe me dhjetëra kanë mbetur të plagosur nga përleshjet që shpërthyen të premten në mbrëmje në burgun e Guajakilit në Ekuador. Gjendja ekonomike e ka rritur dhunën në vend dhe bandat rivale të drogës vijojnë përplasjet për territore, edhe në burgje.
Përleshjet e dhunshme mes të dënuarve në një burg të Ekuadorit kanë lënë mbi 68 persona të vrarë.
Trazirat mësohet se nisën të premten si rezultat i përplasjes mes bandave rivale në burgun e qytetit të Guajakilit.
Policia ndërhyri duke përdorur armë zjarri dhe eksplozivë për të rivendosur rendin.
Forcat speciale i nxorën prej çatisë disa prej kufomave, ndërsa familjarët prisnin në ankth për të mësuar mbi fatin e të afërmve, si në shtator kur në të njëjtat rrethana u vranë 119 persona të tjerë.
“Ankthi i çdo babai dhe nëne është të dinë të paktën si janë. Ka një listë me njerëz të vdekur dhe as presidenti, as shteti nuk po bën asgjë. Ai është baba. Po sikur të ishin fëmijët e tij aty?”
Ekuadori ka regjistruar mbi 1,900 vrasje këtë vit, ndërsa në institucionet e vuajtjes së dënimit kanë gjetur vdekjen deri tani mbi 300 të burgosur.
Masakra e 28 shtatorit po në Guajakil ishte nga më të rëndat në historinë e vendit dhe detyroi presidentin ekuadorin, Gijermo Laso, të shpallë gjendjen e jashtëzakonshme 60-ditore.
Bandat e drogës përplasen shpesh me njëra-tjetrën në burgun e konceptuar për 5,300 të dënuar, por kapaciteti i tij është tejkaluar me 60 për qind.
