Akrepat ‘pushtojnë’ Egjiptin, tre viktima dhe mbi 500 të shtruar në spital

Shirat e denduar dhe përmbytjet në një provincë jugore në Egjipt kanë bërë që tre persona të humbin jetën dhe më shumë se 500 të tjerë të shtrohen në spital, për shkak të pickimit nga akrepat, raportojnë mediat vendase. Reshjet, breshri dhe bubullimat në provincën e Aswanit gjatë fundjavës detyruan autoritetet lokale të pezullojnë mësimin gjatë ditës së sotme, tha guvernatori Ashraf Attia.

Stuhitë i detyruan akrepat të dilnin nga vendet e tyre të fshehta dhe të futeshin në shumë shtëpi në të gjithë provincën, shtoi Attia. “503 qytetarë morën një antidot në Aswan pasi u pickuan nga akrepat që dolën nga strofkat e tyre për shkak të shirave të rrëmbyeshëm”- tha Khaled Abdel Ghaffar, Ministër i Arsimit të Lartë dhe Kërkimit Shkencor i Egjiptit, por që është ministri i përkohshëm i Shëndetësisë.

LEXO EDHE  16 vjet si kancelare, Merkel përcillet me nderime ushtarake/ Porosia e fundit për Gjermaninë (VIDEO)

Qyteti dje u godit nga stuhi, erëra të forta dhe shira të rrëmbyeshëm, thekson faqja Al Arabiya, duke kujtuar se pickimet e akrepave zakonisht nuk janë fatale dhe zakonisht shkaktojnë vetëm dhimbje, mpirje, ndjesi shpimi gjilpërash dhe ënjtje. Megjithatë, në raste të rënda ka vështirësi në frymëmarrje, dridhje të muskujve, lëvizje jonormale të qafës dhe syve, djersitje, të vjella, hipertension, takikardi etje.