Tedi Cara la kombëtaren U-21 për shkak dëmtimi dhe të nesërmen u stërvit menjëherë me Partizanin, çka ngjalli dyshime se arsyeja e largimit mund të ishte një mosmarrëveshje te kuqezinjtë.
Vetë lojtari sqaron gjithçka dhe shuan gjithë zërat. “U habita nga këto thashetheme. Puna është se unë kam pasur disa dëmtime, që më kanë kushtëzuar në derbi, por edhe me Kastriotin sepse nuk kisha bërë stërvitje gjithë javën. Shkova në Kombëtare dhe i thashë se kam këtë problem, që kam tërheqje.
Më çuan te doktori i Kombëtares A dhe bëra ekon. Doktori i Kombëtares A tha se dëmtimin e kam akoma gjallë, me 3 milimetra tërheqje, shumë pak, në fazën e mbylljes, por është ende jo e shëruar plotësisht. Më tha se nëse luaj me Slloveninë, rrezikoj që dëmtimi të më kthehet sërish si në fillim.
Ai tha se duhet informuar trajneri Bushi për dëmtimin dhe unë vendosa të largohem për të mos rrezikuar. Unë jam stërvitur me grupin e Partizanit gjatë një pjese të seancave pa u sforcuar, siç edhe trajneri më porositi. Pjesën tjetër të stërvitjes unë dhe të dëmtuarit e tjerë e kemi bërë të veçuar. Në etapën intensive të stërvitjes nuk kam marrë pjesë”, sqaroi Cara.
