Gani Shehu, ish-zyrtari i burgut të Peqinit, i cili akuzohet për falsifikim dokumentash, do qëndrojë në qeli.
Gjykata e Posaçme ka pranuar kërkesën e SPAK, duke dhënë masën e sigurisë arrest me burg pa afat për ish-shefin e sektorit ligjor në burgun e Peqinit.
Në sallën e gjyqit, Shehu ka mbajtur qëndrim mohues ndaj akuzave.
Arrestimi i tij erdhi pas hetimeve të SPAK dhe policisë. Gjithçka ka marrë shkas nga procedimi penal ndaj shtetasit Viktor Ymerit, i arrestuar në 2020 për dy vrasje mjaft të bujshme, atë të biznesmenit Vajdin Lame dhe Klodian Saliu, fill pasi i shpëtoi burgimit të përjetshëm.
Ymeri konsiderohej si një nga njerëzit më të afërt të Gazmend Brakës, i njohuri me nofkën Gaxhai, me të cilin ekzekutoi me kallashnikov, Arben Pajën dhe Ilir Xhungën. Shehu akuzohet nga SPAK se ka paraqitur të dhëna të rreme për të lehtësuar pozitën e Ymerit.
