Rreth 16 kg kanabis të sekuestruara dhe tre të arrestuar është bilanci i një operacioni të kryer nga policia e Lezhës.
Në pranga u vunë R.D., 29 vjeç, R.N., 20 vjeç dhe P.M., 21 vjeç, banues në Lezhë dhe Mirditë.
Aksioni
Burime zyrtare njoftuan këtë të Premte se “shërbimet e Policisë Lezhë kishin marrë informacione se këta shtetas po transportonin lëndë narkotike nga Mirdita në drejtim të Lezhës. Bazuar në këto informacione, në vendin e quajtur ‘Ura Ushtarake’, në Njësinë Administrative Rubik, shërbimet e Policisë kanë ndaluar automjetet e dyshuara, me drejtues shtetasit P.M. dhe R.D. Gjatë kontrollit të automjeteve tip ‘Ford’ dhe tip ‘Nissan’, të drejtuar nga këta shtetas, shërbimet e Policisë gjetën dhe 15 kilogramë e 387 gramë lëndë narkotike kanabis sativa. Gjithashtu, gjatë kontrollit fizik të ushtruar ndaj shtetasit R.N., pasagjer në njërin prej mjeteve, shërbimet e Policisë i gjetën një peshore elektronike. Në cilësinë e provës materiale u sekuestruan lënda narkotike, peshorja elektronike, 3 aparate celular dhe 2 automjete”.
Nën drejtimin e Prokurorisë vijon puna për identifikimin dhe kapjen e personave të tjerë të përfshirë në këtë veprimtari kriminale, ndërsa Materialet procedurale i kaluan për ndjekje të mëtejshme, Prokurorisë së Rrethit Gjyqësor Lezhë, për veprën penale “Prodhimi dhe shitja e narkotikëve”, kryer në bashkëpunim, njoftoi më tej policia.
