Një fanse 22-vjeçare e reperit Travis Scott, e cila u plagos rëndë në festivalin Astroworld në Hjuston, e çoi numrin total të viktimave në nëntë.
Bharti Shahani vdiq të mërkurën, tha avokati James Lassiter gjatë një konference për shtyp. Studentja kishte marrë pjesë në koncert bashkë me kushëririn dhe motrën e saj më të vogël. Ajo ndodhej prej disa ditësh në gjendje të rëndë shëndetësore.
“Ky ishte festivali i saj i parë muzikor, festivali ynë i parë muzikor. Ajo e priste me padurim. Ajo kishte planifikuar veshjet e saj” – tha motra e saj e vogël.
8 persona të tjerë, të moshës 14 deri në 27 vjeç, u vranë dhe 25 të tjerë u dërguan në spital. Më shumë se 300 njerëz u trajtuan gjatë gjithë ngjarjes në terren, thanë zyrtarët. Një fëmijë 9-vjeçar ndodhet në gjendje kome, familjarët e të cilit kanë paditur dhe reperin amerikan.
Reperi Travis Scott ka thënë se do të ndihmojë familjet e viktimave dhe të plagosurve në koncert.
