Policia italiane ka kapur rastësisht një sasi rekord kokaine që po transportohej në rrugë tokësore.
Një patrullë e policisë rrugore ka ndaluar një kamionçinë që drejtohej nga një shqiptar, pasi po ecte në mënyrë të çoroditur në rrugë.
Ata kanë dyshuar në lidhje me atë që po bënte shqiptari dhe kanë kërkuar ndihmën e Guardia di Financa.
Gjatë kontrollit janë gjetur 400 pako kokaine të pastër me peshë 476 kilogramë.
Shqiptari, pronar i dy kompanive ndërtimi në Itali, tërhoqi vëmendjen e policisë për shkak të zigzageve në rrugë, pa mbajtur krahun e djathtë, dhe mbi kruskot kishte një fenelinë të verdhë, zotërimin e së cilës nuk mund ta justifikonte.
Mjeti tip kamionçinë u ndalua nga patrulla e policisë rrugore dhe u shoqërua në rajon, ku drejtuesi dhe pronari i mjetit u identifikua si shqiptar me rezidencë në Firenze.
Ai ishte nervoz përballë pyetjeve të policës për praninë e fenelinës, nga ato që përdoren për mjetet që punojnë në kantiere. Ndërhyrja e Guardia fi Finanza verifikoi se ai ishte titullar i dy firmave ndërtimi. Më pas u vazhdua me kontrollin e mjetit që ishte i mbushur me vegla muratorësh, por pas heqjes së veglave të para dolën në dritë pakot e kokainës, plot 400, me peshë totale 476 kilogramë, me vlerë mbi 45 milionë euro.
38-vjeçari u arrestua menjëherë, ndërkohë që nisur nga sasia e madhe e drogës mendohet që ajo ishte e destinuar për një treg më të madh se ai i Arezzos, një qytet me 100 mijë banorë.
