Këshilli i Ministrave ka marrë vendim sot që të gjithë ata që do të marrin pjesë në mënyrë vullnetare në aksionet e ushtrisë sidomos në drejtim të përballjes me fatkeqësitë natyrore do të marrin trajtim financiar.
Pas mbledhjes së qeverisë, ministri i Mbrojtjes, Niko Peleshi se “projektvendimi i parë ka të bëjë me policimin e listës së artikujve dhe teknologjive me përdorim të dyfishtë. Pra të artikujve dhe teknologjive që kanë riskun e përdorimit qëllime të tjera, të ndryshme nga ato primare dhe që janë të ekspozueshme. Ky është një detyrim që buron nga BE për përafrimin e legjislacionit nga njëra anë, dhe nga ana tjetër për të rritur sigurinë kombëtare sepse një kontroll më i mirë i kësaj liste të përditësuar artikujsh do të thotë më shumë siguri dhe mbrojtje dhe natyrisht dhe për bizneset e përfshira në atë fushë është një garanci, një premisë për të zhvilluar aktivitetin e tyre duke qenë tashmë të certifikuar nga një autoritet shtetëror, siç është Autoritet i Kontrollit të Eksporteve në këtë rast”.
Peleshi shtoi se projektvendimi i dytë që u miratua sot është vendimi që synon të nxisë vullnetarizmin.
“Të gjithë e dimë që se vullnetarizmi nuk ka patur ditë të mira por sot ne jemi krenar për dhjetëra dhe qindra vullnetarë që na bashkohen në përpjekjet tona jo vetëm në fushën e sigurisë kombëtare dhe të mbrojtjes, por ajo që është më e shpeshtë dhe me vizibël përballja me fatkeqësitë natyrore me Emergjencat Civile. Aty kemi nevojë gjithmonë për vullnetar, por nga ana tjetër me këtë projektvendim ne i japim mundësi institucioneve të trajtojnë me dinjitet vullnetarët. Vullnetarizmi është një vokacion i brendshëm qytetarë nga njëra anë tjetër kërkon dhe vëmendje në trajtim. Përmes këtij vendimi ne kemi mundësi të trajtojmë me transport me akomodim, ushqim dhe me një pagesë dinjitoze të merituar të gjithë vullnetarëve që përfshihen në aksionet tona të përbashkëta në fushën e mbrojtjes civile apo në fushat e tjera”, tha ai.
