Një shqiptar raportohet se është arrestuar nga policia greke lidhur me grabitjen e përgjakshme të ndodhur orët e para të së Shtunës në Selanik.
Sipas mediave helene, autori është një 27-vjeçar shqiptar, i vënë në pranga në banesën e tij gjatë mëngjesit të kësaj të Marte në rrugën “Lambraki”, në Toumpa të Selanikut.
Ndërkohë, bashkëpunëtori i tij, një 35-vjeçar grek, u vu në pranga mbrëmjen e djeshme.
Drejtoria e Përgjithshme e Policisë së Selanikut doli me një njoftim për vrasjen e 44-vjeçarit, punonjës i dyqanit, pas grabitjes. Sipas hetimeve policore, një person i maskuar hyri në dyqan dhe nën kërcënimin e armës mori një shumë parash (raportohet rreth 700 euro).
Gjatë reagimit të shitësit të dyqanit, autori e goditi me dorezën e armës së zjarrit në kokë. 44-vjeçari u plagos dhe humbi jetën më vonë në spital. Një gëzhojë u gjet në vendngjarje.
Ende nuk raportohet identiteti i shqiptarit të arrestuar si autori i ngjarjes.
