Ka lindur në Tiranë dhe i pëlqen të kontribuojë për kryeqytetin. Është vetëm 18-vjeç, megjithatë në fushën e blertë tregon cilësitë e një lojtari të së ardhmes. E ka nisur me moshat amatore të Petrelës për të vijuar më vonë me Partizanin. Në datën 1 shtator të 2018-tës provon emocionet e fanelës së kuqe.
Bëhet fjalë për Ermir Spahiun, një emër jo shumë i dëgjuar nga futbolldashësit shqiptarë, por që pritet të bëhet një nga të preferuarit e tyre. Tashmë është pjesë e ekipit U-21 që drejtohet nga Dritan Mehmeti. Mesfushori është titullar i padiskutueshëm dhe pikë referimi për trajnerin e njohur. Cilësitë e shtatshkurtrit janë vënë menjëherë re edhe nga Ilir Daja.
Trajneri i Partizanit e ka ftuar të stërvitet me skuadrën e parë. Fillimisht duhet të japë maksimumin te 21-vjeçarët pasi formacioni në ekipin e Dajës është ende një mision i vështirë. Cilësitë teknike të tij kanë joshur stafin teknik të Partizanit duke i ofruar menjëherë një marrëveshje profesionisti. Nëse vazhdon me ritme të tilla, padyshim që nuk do të jetë e largët dita që të provojë dhe fanelën e skuadrës së parë.
