Opozitë apatike, e ka cilësuar ish-Kryeministri Sali Berisha, qëndrimin e mbajtur nga Partia Demokratike gjatë 8 viteve të qeverisjes së Edi Ramës, që e cilësoi si një regjim, që mori edhe mandatin e tretë në zgjedhjet e 25 prillit.
Nga Pogradeci, ku po zhvillon “Foltoren”, Berisha tha se në 8 vite Shqipëria ka thyer çdo rekord të zi në Europë, duke u kthyer nga vendi me pagat më të larta në rajon, sot është vendi me pagat mesatare më të ulëtat, me pensionet më të ulëtat, por me çmimet më të larta në Rajon, dhe ndër më të lartat në Europë.
Berisha tha se në Shqipëri nafta shitet me çmimin që shitet në Zvicër, paçka se zviceranët kanë paga 10 herë më të larta, se paga më e lartë e shqiptarëve.
“Rreth 520 mijë shqiptarë u larguan nga Shqipëria në 8 vitet e Edi Ramës. U larguan nga vendi sepse nuk ndërtojnë dot jetën e tyre, sepse Edi Rama, si kreu i meduzës vrau te ata shpresën”, tha Berisha.
Sipas tij, Rama zëvendësoi në këtë vend shtetin e mafies në vend të shtetit ligjor.
“Në Parlament ligjet diktohen ligje nga trafikantët, të cilët emërojnë edhe ministrat. Korrupsioni është bërë lubi në këtë shtet, korrupsioni i mëparshëm nuk krahasohet asnjëherë me korrupsionin e sotshëm”, tha Berisha.
Sipas tij, konservatorët për të luftuar korrupsionin përdorin dy armë: qeverinë e vogël dhe transparencën. Berisha tha se janë rritur me 15 herë tenderat sekrete, që janë vjedhje dhe vetëm vjedhje.
“Vetëm për inceneratorët janë firmosur kontrata 420 mln euro”, tha Berisha, duke shtuar se mafia qëndron në krye të plehrave.
