Një punonjës i Bashkisë së Himarës është vënë në pranga për veprat penale “Falsifikimi i dokumenteve” dhe “Pastrimi i produkteve të veprës penale”.
Burime zyrtare nga policia konfirmuan këtë të Martë se u arrestua Elton Marko, 41 vjeç, banues në Himarë, me detyrë topograf pranë Bashkisë Himarë.
Ai dyshohet se ka falsifikuar formularin e Aktit të Marrjes së Tokës në Pronësi, të cilin e ka përdorur për regjistrimin e një pasurie në fshatin Dhërmi dhe më pas e ka shitur tek persona të tjerë.
Ndaj 41-vjeçarit, Gjykata e Vlorës caktoi me kërkesë të Prokurorisë masën e arrestit me burg në mungesë. Në zbatim të vendimit të gjykatës dhënë më 6 Nëntor, policia arrestoi zyrtarin e bashkisë.
