Kanë dalë pamjet e para të një feste të shthurur në Tiranë. Një tunel në të dalë të Tiranës, i cili gjatë komunizmit përdorej për municione ushtarake, fundjavën që lamë pas ishte vendi i përzgjedhur për një festë sekrete “rave” të organizuar në brendësi të tij nga një grup të huajsh, mes muzikës elektronike techno, drogës, seksit dhe simboleve hipnotizuese.
Ftesat m’u gjendën në duar krejt rastësisht kur teksa po shëtisja andej me një grup miqsh, u hasëm me disa të huaj që po shkarkonin nga një rimorkio makine disa bokse të mëdha muzike. Ata na pyetën nëse ishim aty për festën, e cila në fakt ishte e fshehur e për të cilën ne nuk kishim dëgjuar vërdallë këto ditë…
Ora 10 e mbrëmjes na gjeti duke u endur nëpër errësirë në kërkim të tunelit, jashtë të cilit kishte tek-tuk njerëz që po konsumonin alkool nën muzikën e fortë që buçiste.
Alkoolin së bashku me drogën i kishin sjellë vetë ndërsa në brendësi të tij shquheshin nga larg dritat hipnotizuese që feksnin dhe fikeshin në ritëm të vazhdueshëm kohor.
Njerëz që endeshin si të shkëputur nga realiteti, të tjerë që konsumonin drogë të ulur përtokë dhe një grup tjetër mes të cilëve kishte edhe shqiptarë që putheshin dhe kërcenin ngjitur me njëri-tjetrin, ky ishte imazhi i parë me të cilin u përballa, një imazh tipik i festave ‘rave’.
