Koncerti i reperit Travis Scott në Hjuston u kthye në tragjedi kur tetë persona ndërruan jetë dhe 300 të tjerë u lënduan, për shkak të një turme që nisi të shtynte. Rreth 50,000 njerëz ishin prezentë në festival.
“Turma filloi të shtyhej dhe të shtohej drejt pjesës së përparme të skenës, gjë që bëri që njerëzit në pjesën e përparme të ngjisheshin. Ata nuk qenë në gjendje t’i shpëtonin asaj situate. Njerëzit filluan të rrëzoheshin, të humbnin ndjenjat dhe kjo krijoi panik shtesë.
Më shumë se 300 njerëz u trajtuan në spitalin e ngritur pranë festivalit. 23 persona u dërguan në spitale, 11 prej të cilëve ishin në gjendje kritike dhe 8 prej tyre vdiqën. Një pacient ishte 10 vjeç dhe nga kontrolli i fundit ishte në gjendje kritike“- tha tha shefi i zjarrfikësve të Houston, Sam Pena për “CNN”.
Njerëzit që morën pjesë në koncert ndanë në rrjetet sociale kaosin që u krijua. Personeli mjekësor ishte aq i mbingarkuar me lëndimet saqë disa anëtarë të publikut u përpoqën të jepnin ndihmën e shpejtë. Nga transmetimi i drejtpërdrejtë, Scott dukej se ndali performancën, ndërsa një ambulancë po drejtohej në vendngjarje.
Pas ngjarjes tragjike, ka reaguar edhe Kylie Jenner e cila ishte gjithashtu e pranishme së bashku me motrat e saj dhe të bijën 3-vjeçare. Në një postim në rrjete sociale, Kylie theksoi faktin se Travis nuk e kishte kuptuar se çfarë po ndodhte ndërkohë që performonte.
“Dua ta bëj të qartë se ne nuk ishim në dijeni të viktimave derisa doli lajmi pas shfaqjes dhe kurrë në botë nuk do të kishim vazhduar xhirimet apo performancat.
Unë po u dërgoj ngushëllimet më të thella familjeve gjatë kësaj kohe të vështirë dhe do të lutem për shërimin e të gjithë atyre që janë prekur. Dhe gjithashtu për Travisin, për të cilin e di se kujdeset thellësisht për fansat e tij dhe komunitetin e Hjustonit.”- shkroi Kylie.
Kylie u kritikua në rrjetet sociale për postimin e pamjeve në Instagramin e saj që tregonin një ambulancë që përpiqej të shkonte drejt viktimave. Por ajo u justifikua duke thënë se nuk ishte në dijeni të asaj që po ndodhte.
