Të tronditur janë banorët e zonës së Nea Ionia në Volo, por edhe e gjithë Greqia pas lajmit për vrasjen e një 75-vjeçareje nga fëmija që kishte pagëzuar. Sipas mediave të huaja, autori ka shqetësuar edhe në të kaluarën autoritetet për shkak të precedentëve penalë, pasi ka qenë i akuzuar për përdorim droge dhe vjedhje.
Autori ka vizituar kumbarën dhe i ka kërkuar para. Ajo, duke qenë e “pasur”, e kishte mbështetur në të kaluarën dhe e kishte ndihmuar në mënyra të ndryshme, me shpresën se ai do të ndryshonte. Por, kësaj radhe 75-vjeçarja duke ditur të kaluarën dhe zakonet e tij, ka refuzuar t’i japë shumën prej 2000 eurosh.
Kur ajo refuzoi, ai nxori një thikë dhe e goditi atë. Raportohet se ajo është goditur më shumë se 20 herë me thikë në fytyrë dhe trup. Akoma më tragjik është fakti se në momentin e vrasjes në të njëjtën shtëpi ndodhej edhe djali i 75-vjeçares, i cili për shkak të problemeve shëndetësore që ka nuk e kuptoi vrasjen e nënës së tij.
Pas aktit të tmerrshëm, i riu i mbylli gojën me shirit izolues dhe i mbështolli trupin me çarçafë dhe jorgan. Më pas e tërhoqi zvarrë në ashensor, ku janë gjetur njolla gjaku dhe e ka transportuar në bodrumin e pallatit, ku ka lënë trupin e saj.
