Ish-Ambasadori amerikan, Richard Grenell ka publikuar një opinion në faqen e Qendrës Amerikane për Ligj dhe Drejtësi, ku shprehet se nuk ka prova për vendimin e DASH për Sali Berishën.
Në artikull, Grenell shkruan se Blinken po vepron si agjent i Soros në Ballkan.
“Administrata e Biden është lëkundur sërish duke krijuar një tjetër fiasko ndërkombëtare, këtë herë është Sekretari i Shtetit Blinken që kryeson akuzën për ndërhyrje në politikat zgjedhore, duke e përqendruar vëmendjen e tij te ish-presidenti i Shqipërisë, Sali Berisha. Për ata që nuk e njohin politikën ballkanike, zoti Berisha është një njeri me një të kaluar dinamike, një kundërshtar i vendosur i komunizmit, themelues i Partisë Demokratike të Shqipërisë dhe mik i Amerikës. Pas një karriere të gjatë për të rikthyer Shqipërinë në dritë pas shtypjes komuniste, zoti Berisha është tërhequr kryesisht nga pjesëmarrja e drejtpërdrejtë në politikë, duke preferuar të ndihmojë në promovimin e konservatorëve me të njëjtat mendime dhe politika anti-socialiste. Por Sekretari Blinken tronditi rajonin në maj duke shpallur sanksione udhëtimi, në dukje të pabaza, kundër zotit Berisha dhe familjes së tij të ngushtë, duke i ndaluar hyrjen në SHBA”, shkruan Grenell.
Më tej, ai thekson se edhe pse kongresmeni Lee Zeldin ka kërkuar prova për këtë vendim, Blinken nuk ka ofruar asgjë.
“Aktualisht e vetmja provë që dimë ne është kundërshtimi i vendosur i Berishës ndaj ndërhyrjes politike të Soros, të cilin Berisha e ka denoncuar për anashkalim të sundimit të ligjit dhe për ndikim informal në të gjithë rajonin e Ballkanit,” thekson Grenell.
Grenell shkruan se ai vetë nuk ka parë asnjë provë të tillë. Nëse ka ndonjë të tillë, Grenell thotë se Blinken duhet t’i drejtohet Kongresit.
“Është koha që Kongresi të kërkojë provat për sanksionet shqiptare, që Blinken tha se i kishte. Unë personalisht nuk i kam parë kurrë dhe jam përqendruar në çështjet e Ballkanit si drejtor në detyrë i Inteligjencës Kombëtare”, shprehet.
“Shtetet e Bashkuara janë dhe do të jenë gjithmonë një komb i qeverisur nga ligji dhe arsyeja; dhe këto sanksione, në mungesë të provave, shërbejnë vetëm për të minuar besueshmërinë e SHBA-së. Sekretari Blinken duhet të sigurojë provat e tij mbështetëse nëse Kongresi dhe populli amerikan do të kenë ndonjë besim në kompetencën e Biden në skenën botërore. Është koha që Kongresi të kërkojë provat për sanksionet shqiptare që Blinken na tha se kishte. Unë personalisht nuk i kam parë kurrë dhe jam përqendruar në çështjet e Ballkanit si ushtrues detyre i drejtorit të Inteligjencës Kombëtare”, përfundon ai.
Richard A. Grenell është ish-Drejtori i Inteligjencës Kombëtare Amerikane dhe ish-ambasador i SHBA-së në Gjermani. Aktualisht, ai është Këshilltar i Lartë për Sigurinë Kombëtare dhe Politikën e Jashtme në Qendrën Amerikane për Ligj dhe Drejtësi.
