Tetë persona kanë vdekur dhe dhjetëra njerëz janë lënduar në natën e hapjes së një festivali muzikor në Hjuston, Teksas, teksa janë shtyrë mes njëri tjetrit për t’u afruar në skenë. Paniku shpërtheu pasi turma filloi të ngjeshej drejt pjesës së përparme të skenës në Festivalin Astroworld të Travis Scott, thanë zyrtarët vendas.
Njëmbëdhjetë persona u dërguan në spital pasi pësuan arrest kardiak dhe tetë prej tyre vdiqën. Rreth 300 njerëz u trajtuan për lëndime të tilla si prerje dhe mavijosje në eventin, ku morën pjesë 50,000 njerëz.
Reperi Travis Scott ndaloi disa herë gjatë performancës së tij 75-minutëshe kur vuri re fansat në ankth pranë pjesës së përparme të skenës. Ai i kërkoi sigurimit të shihte nëse ata ishin mirë dhe t’i ndihmonin të dilnin nga turma. Organizatorët e ndërprenë koncertin kur u duk se shumë njerëz ishin lënduar.
