Kryetari i Partisë Demokratike, Lulzim Basha ka urdhëruar zgjedhje edhe për kreun e Lidhjes së Gruas, që aktualisht mbahet nga Albana Vokshi.
“Pas vendimit për riorganizimin dhe zgjedhjen e organeve drejtuese të Forumit Rinor, edhe Lidhja Demokratike e Gruas së Shqipërisë do të hyjë në një proces zgjedhor. Kryetari i PD Lulzim Basha udhëzoi zhvillimin e zgjedhjeve për kryetaren e LDGSH-së, post i cili mbahet me emërim që prej vitit 2012, si dhe të organeve të tjera drejtuese të Lidhjes së Gruas. Zgjedhja e kryetares së LDGSH-së do të bëhet sipas parimit 1 anëtar, 1 votë. Kjo është hera e parë që anëtareve të Forumit të Gruas u njihet e drejta për të zgjedhur drejtuesen e tyre me votë direkte. Për të garantuar standardet e procesit, Kryetari Basha ngriti një grup të posaçëm për zgjedhjet në LDGSH, i cili përbëhet nga: Grida Duma, Arta Sakja, Dhurata Çupi, Orjola Pampuri, Greta Bardeli, Alfrida Marku, Ina Zhupa, Eralda Tase Bano, Zheni Gjergji, Ledina Aliolli. Grupi i punës do të mbikëqyrë mbarëvajtjen e procesit për zgjedhjen e Kryetares dhe zgjedhjet dhe riorgarnizimin e të gjitha forumeve të tjera të LDGSH në qendër dhe në degë. Në LDGSH mungojnë prej vitesh forume të tilla drejtuese si kryesia apo Këshilli Kombëtar i LDGSH-së”, thuhet në një njoftim të zyrës së shtypit të Partisë Dmeokratike.
Me arsyetimin e mbarimit të mandatit, Basha urdhëroi një ditë më parë zgjedhje edhe për kreun e FRPD-së dhe kryesisë së këtij forumi.
Vendimi u cilësua “nul” dhe “në tejkalim të kompetencave nga Basha”nga kryetari i formumit rinor Belind Këlliçi dhe anëtarë të kryesisë. Ata u shprehën se vendimi i Bashës erdhi pasi mbështetën “Foltoren” e ish-kryeministrit Sali Berisha.
Sot, Basha mohoi akuzat, duke i cilësuar i ka cilësuar “sajesa për interesa personale” deklaratat se vendimi për zgjedhjet në FRPD vjen pasi shumica e anëtarësisë dhe kreu i kësaj organizate Belind Këlliçi kanë mbështetur “Foltoren” e ish-kryeministrit Sali Berisha.
Lidhur me vendimin e Bashës reagoi edhe Albana Vokshi, e cila tha se “organizatat Partnere të Partisë Demokratike, LDGSH dhe FRPD, janë forume që organizohen dhe drejtohen në bazë të Statutit të tyre dhe askush, as Kryetari i PD, nuk ju merr dot vendimmarrjen”.
