Gjykata e Gjirokastrës caktoi masën e sigurisë burg 45 ditë për Kabul Hundën, i akuzuar për përdhunimin e një të miture 16-vjeçare nga qyteti i Libohovës.
Kryesuesja e seancës së masës së arrestit, Suela Dashi, në fillim të gjykimit ia ka dhënë fjalën prokurorit Julian Çafka, i cili në tërësinë e argumenteve të paraqitura, ka kërkuar në përfundim 45 ditë burg me arsyetimin e hulumtimit të disa pistave që besohen se do të zbardhin ngjarjen e ndodhur.
Prezent në seancë ka qenë edhe vetë 54-vjeçari Hunda, i cili ka qënë shumë i qetë dhe ka dhënë shpjegime për ngjarjen në fjalë. Nën prezencën e avokatit të caktuar nga shteti, 53-vjeçari e ka deklaruar veten të pafajshëm dhe sipas tij këtë e di gjithë Libohova.
Hunda ka deklaruar se 16-vjeçarja ka pasur dhe ka raporte intime me një 32-vjecar nga qyteti i Libohovës dhe se ai nuk ka abuzuar me të.
“Jam shumë i qetë se në përfundim do dalë tjetërkush i akuzuar për një vepër të stisur”, është shprehur Hunda. Ai deklaroi se 16-vjeçaren e ka trajtuar si vajzën e tij, pasi janë pjesë e një familjeje dhe në asnjë rast nuk ka pasur tentativa për të kryer marrëdhënie intime.
“Jam i bindur që pas kryerjes së analizave në trupin e 16-vjeçares, do zbulohet AND-ja e një tjetër personi që është 32-vjeç nga Libohova”, u shpreh Hunda.
Sakaq, në përfundim të seancës, gjyqtarja Suela Dashi ka aprovuar kërkesën e prokurorit Julian Çafka.
