Pas operacionit të policisë që rezultoi me kapjen e Saimir Kuçit dhe shpalljes në kërkim të Artan Prenga, ka reaguar për “Fax News” biznesmeni nga Nikla, Nazmi Çangu.
Ai është shoqëruar në polici për të dhënë deklarimet e tij, në një kohë kur në disa zona qendrore të vendit, zhvillohej operacioni.
“Kam qenë në policinë e Krujës sot. Nuk njoh asnjërin nga personat që janë lakuar si të arrestuar apo të shpallur në kërkim. Janë edhe persona të tjerë që duhen identifikuar, sepse në banesën time kanë qenë 7-8 persona, i kemi parë me sy”, tha ai.
I pyetur rreth detajeve që atij i kanë kërkuar apo e kanë pyetur në polici, Nazmiu u përgjigj shkurt. Ndërsa në lidhje me aludimet se në banesën e tij ishin marrë dokumente me vlerë, ai e mohoi këtë gjë.
“Në polici folëm për punët tona. Ça dokumentesh thua mor vlla. Në shtëpi dokumenta të banesës dhe të tokave kam, dyqan ça kam, ça do jenë?!“, deklaroi Cangu.
I pyetur për persona të tjerë që ai mund të ketë dyshime se janë përfshirë në grabitje, ai tha se nuk di asgjë dhe se ua ka lënë autoriteteve ta zbardhin.
