Komisioneri Shtetëror i Zgjedhjeve, Ilirjan Celibashi, prezantoi gjetjet e procesit të verifikimit post-zgjedhor të kryer për procesin e 25 prillit.
Sa i përket subjekteve, ndryshimet e vërejtura kanë qenë minimale, ndërsa dallime më të mëdha janë gjetur te vota preferenciale për kandidatët, theksoi Celibashi.
“Janë 20 zgjedhës të cilët dyshohet të kenë votuar në 2 qendra votimi të ndryshme. Nga të dhënat paraprake që ne kemi, na rezulton se këta janë komisionerë, të cilët kanë votuar te qendra e votimit ku kanë pasur emrin e tyre, por edhe në qendrën ku kanë ushtruar detyrën si komisionerë.
71% e qendrave të votimit nuk kanë pasur diferenca për partitë politike. Janë 28% e qendrave të votimit që kanë diferencë, të cilat kanë diferencë nga 1 deri në 9 vota. Vetëm në 4 qendra votimi, në të cilat diferenca është nga 10 deri në 30 vota dhe nuk ka asnjë qendër votimi në të cilat diferenca e votave për partitë politike të jetë mbi 30 vota”, u shpreh Celibashi.
