Lideri i Partisë Demokratike Lulzim Basha përdori një term në Kuvend, Trekëndëshi i Bermudës, ku përfshiu ata që ai cilëson liderët e të kaluarës të transicionit shqiptar, Edi Ramën, Ilir Metën por edhe vetë Sali Berishën.
Por përfshirja e liderit historik të PD-së në atë term, sipas ish-presidentit të vendit Bujar Nishani, është një nonsens. “Çështja që e lidh artikulimin me forca të tjera politike nuk më intrigon, sepse për momentin kemi hallin e vetes, në PD. Por asocimi i zotit Berisha në të keqen e së kaluarës, e përfshin vetë zotin Basha në atë të keqe, në mënyrë të drejtpërdrejtë. Në shumicën dërrmuese të periudhës kur Berisha ka qenë vendimmarrës në vend, Basha ka qenë pjesë e tij”, thotë Nishani i ftuar në emisionin “Intervistë” në A2 CNN.
Por a tregon kjo një fitore strategjike të kryeministrit, që në fushatë ka bindur elektoratin se ardhja në pushtet e Bashës do të ishte në fakt rikthimi i Berishës dhe Metës? Sipas Nishanit, për këtë pikë, “duhet të pranojmë ose që Rama fitoi zgjedhjet se i adresoi elektoratit “gogolët” Berisha dhe Meta, ose sepse vodhi votat, bëri masakër zgjedhore dhe opozita ishte shumë e dobët për të reaguar. Nëse janë më shumë faktorë, atëherë gjithsesi duhet të ketë një matshmëri. Berisha nuk u ekspozua në fushatë, prandaj nuk besoj. Unë mendoj se Basha nuk arriti të shihet si i besueshëm te votuesi jo-tradicional i PD-së”.
Nishani vijnë në kritikën ndaj Bashës, duke nënvizuar që sipas tij ai ka demonstruar “paaftësi dhe mungesë antenash politike, si dhe mungesë të ekipit, pa llogaritur dështimin në zgjerimin e bazës. Këto kanë sjellë dështime dhe kjo është pjesë e karakterit të tij”.
Por a është kjo çështje paaftësie apo edhe strategjie të qëllimshme? Nishani e len të kuptohet. “Mund të kem hamendësime, por do të kisha brenda një dozë spekulimi, por mund të them padyshim se ka treguar paaftësi totale, plus ka problem me integritetin, besimin që kanë kolegët, aleatët dhe elektorati tek ai. Për qëllimet kam të drejtën të ngre akuza, sepse djegia e mandateve i dha shtysë Ramës për të ndryshuar Kushtetutën dhe sistemin zgjedhor, kurse bojkotimi i zgjedhjeve vendore i dha Ramës kontrollin e 100% të territorit”, ishin fjalët e tij.
