Nga BoldNews.al
Shoqata Kombëtare e Ndërmjetësve të Pasurive të Paluajtshme të Shqipërisë (NAREA) është e shqetësuar se Ministria e Drejtësisë e ka përjashtuar nga konsultimi për projekt-ligjin e ri, që lidhet me aktivitetin e tyre.
Në një deklaratë publike, të shpërndarë këtë të Enjte (dt.04.11.2021), NAREA thotë se institucioni i drejtuar nga Ulsi Manja i ka ftuar të japin qëndrimin e tyre për projektin e ligjit të ri pasditen e së Mërkurës, ndërkohë që takimi përmbyllës është caktuar për të premten.
“Gjatë ditës së djeshme (3 Nëntor 2021), pothuajse në përfundim të orarit zyrtar, jemi njoftuar nga Ministria e Drejtësisë për një takim përmbyllës konsultativ ditën e premte, datë 5 nëntor 2021, duke lënë kështu në dispozicion, për të konsultuar paraprakisht një Projektligj kaq të rëndësishëm për ne, vetëm 1 ditë pune. Marrë në konsideratë këtë, e bën të pamundur dhënien e një kontributi ndërtues nga komuniteti i biznesit të NAREA”, thuhet në deklaratën e Shoqatës së Ndërmjetësuesve.
Siç thuhet në qëndrimin publik, NAREA “shpreh jo vetëm shqetësimin tonë, por dhe kërkesën ndaj Ministrisë së Drejtësisë, si institucion ligj hartues, që të marrë në konsideratë krijimin e hapësirës kohore të nevojshme, duke mos nxituar të përmbyll Konsultimin dhe vetë Projektligjin në fjalë, për të ndërtuar bashkërisht një Ligj të qëndrueshëm në kohë dhe që i shërben të gjithë aktorëve në këtë proces”.
NAREA deklaron se mbetet e përkushtuar që të japë kontributin ndërtues, si dhe të udhëheqë nëse është e nevojshme, drejtë standardeve më të larta të një kuadri Ligjor dhe Rregullues të Ndërmjetësimit të Pasurive të Paluajtshme.
“Ne dëshirojmë kështu mirëfunksionimin e këtij sektori sipas praktikave më të mira në vendet e zhvilluara si USA & EU”, përfundon deklarata publike e Shoqatës Kombëtare të Ndërmjetësuesve të Pasurive të Paluajtshme të Shqipërisë.
NAREA është grupimi i Ndërmjetësve të Pasurive të Paluajtshme, Brokerave dhe Rrjeteve të Franshizave që operojnë në Shqipëri. Në statusin e saj është përcaktuar se NAREA synon Promovimin e Biznesit të Ndërmjetësimit të Pasurive të Paluajtshme, Zhvillimin & Strukturimin e Sektorit të Pasurive të Paluajtshme, Përfaqësimin Profesional të Interesave të Aktorëve në treg, si dhe të Udhëheqë drejtë Standardeve të Larta të Etikës në Biznes.
