Kryeministri Edi Rama tha këtë të Enjte se Shqipëria ka merita për rolin diplomatik që sipas tij, ka luajtura në avancimin e bisedimeve mes Kosovës e Serbisë.
Në një konference më gazetarë nga Beogradi, Rama deklaroi se situata e dialogut mes dy vendeve ka ardhur duke u përmirësuar dhe ftoi Kosovën ti bashkohet nismës “Ballkani i Hapur”.
“Deri jo shumë vite më parë s’mund të bëheshin dot tryeza në nivele të treta apo të katërta të administratës, sepse serbët çoheshin dhe iknin nga tavolina. Sot Serbia thotë: ‘bujrum, hajde ulemi, jeni të mirëpritur’. Është një arritje shumë e madhe për shqiptarët, është një arritje shumë e madhe edhe për Kosovën që është rezultat i politikës së jashtme dhe diplomacisë sonë për ta çuar rajonin në këtë rrugë. Unë s’marr vendime në emër të Kosovës, por është pak por e sigurt që ky proces sjell vetëm të mira (Ballkani i Hapur). Ta refuzosh procesin do të thotë ti mohosh popullit të mirat që sjell procesi”, tha Rama.
Këtë të Enjte, u zhvillua në kryeqytetin serb samiti i Ballkanit të Hapur, ku edhe këtë herë vendet pjesëmarrëse ishin tre, Maqedonia e Veriut, Serbia dhe Shqipëria. Ndërkohë, në samit nuk morën pjesë Mali i Zi, Kosova e Bosnje-Hercegovina.
