Ish-futbollisti i njohur, Redi Jupi ka analizuar gjendjen aktuale që Partizani po kalon. Jupi ka veçuar disa tematika duke deklaruar se faj nuk ka trajneri Daja, por lojtarët duke parë paraqitjet dhe iniciativat e munguara të tyre. Më tej ai shton se kjo gjendje vjen nga një krizë zgjedhjesh dhe marrëdhëniesh mes stafit teknik, futbollistëve dhe klubit:
“Te Partizani është një problematikë tjetër. Tani shoh se janë futur në një krizë identiteti. Tani nuk janë të sigurt për asgjë, as për cilësinë e lojtarëve që kanë brenda, për këta lojtarë që kanë çfarë duhet të synojnë. Skuadra ka humbur shumë nga vetbesimi i saj. Ilir Daja përpara 5 muajsh u propozua për trajner të ekipit Kombëtar.
E kam thënë që se duhet të marrim një erë të re, një ndryshim që kemi në lidhje me mendimin e trajnerëve të huaj, pra këta janë trajnerët shqiptarë, Ilir Daja, Mirel Josa, Shpëtim Duro, Skënder Gega këta apo edhe ndonjë tjetër që kanë bërë mirë dhe janë konfirmuar në kampionatin tonë që do të shkonin atje. Papritmas pas katër muajsh thonë që nuk bën domethënë.
Kjo çështje nuk duhet të jetë kështu. Aty është futur në një krizë zgjedhjesh që vjen nga një krizë marrëdhëniesh që mund të ketë aty të brendshme në kuptimin që duket nga jashtë të paktën që nuk ka ndonjë afinitet shumë të madh të grupit, stafit teknik me lojtarët dhe klubit. Nuk është shumë solide, nuk funksionon kjo gjë.
Pastaj automatikisht, sado i mirë të jetë trajneri e çon në një krizë mendimesh dhe krizë zgjedhjesh të gabuara. Kjo nuk e bën Ilir Dajën trajner të keq, siç nuk e bën dhe Brdariç trajner të keq. Një klub i mirë, një klub i fortë dhe solid pikërisht këtu dallohet nga një klub i zakonshëm, sepse vë trajnerin dhe veten në një situatë të tillë, rregullohen dhe marrëdhëniet e brendshme, hiqen dilemat e mëdha që trajneri ka në kokë që në moment tjetër nuk do t’i kishte, sepse aty duket qartë që zgjedhjet nuk janë të duhurat.
Nuk po them zgjedhje individësh, por po them zgjedhje në përgjithësi për strategjitë që mund të ketë për ndeshje të caktuara. Presioni i shtuar e ka bërë aty që pothuajse asgjë nuk funksionon. Unë për veten time, përveç kusuret e stafit, kusuret e drejtuesve, unë për atë që shoh për Partizanin fajin më të madh ia vë lojtarëve, në kuptimin e performancës individuale të tyre.
Si ka mundësi që janë futur në një krizë besimi aq të madh dhe aty nuk sheh asnjë lojtar që të japë një pasim në kohën e duhur. Po të shohësh Partizanin, çdo pasim është dy metra prapa, e marrin topin e udhëheqin dhe kur e japin pasin e shoqërojnë me sy se ku po shkon pasimi. Janë futur në një frikë shumë të madhe, nuk sheh ndonjë lojtar që të futet në driblim që të kalojë kundërshtarin direkt.
Kjo është krizë besimi, krizë konfidence, kjo e bën që loja të jetë e mërzitshme, e ngadaltë, e parashikuar dhe jo e rrezikshme për kundërshtarin.”, tha Redi Jupi për “Proçesi Sportiv”.
