Partizani i këtij sezoni është hija e vetvetes, për të mos thënë skuadra me rezultatet më të dobëta në Superiore në 7 javët e para.
Sikur të mos mungojnë vuajtjet e pritjes së fitores së parë në kampionat, ku në 7 javë kanë 5 barazime dhe dy humbje, për dy ndeshjet e kësaj jave, Kupë dhe kampionat, Partizani do ta ketë grupin më të cunguar. Përveçse lanë dy pikë ndaj Egnatias, të kuqtë kanë humbur edhe 3 lojtarë.
Damçevski dhe Maguet u zëvendësuan që në mesin e pjesës së parë dhe dëmtimet e tyre kërkojnë kohë rikuperimi. Por, dje, situata e mungesave është përkeqësuar edhe më shumë, pasi minimumi për dy ndeshjet e kësaj jave nuk do të kenë edhe shërbimet e kapitenit Alban Hoxha.
Portieri prej javësh ka vuajtur një lëndim në dorën e djathtë, madje pas takimit me Egnatian ka dalë i fashuar pasi ka dëmtuar kockën e një gishti. Në ndeshjen e parë të Kupës në Lezhë, të kuqtë nuk do të kenë në drejtim trajnerin Ilir Daja, i cili do të vuajë dënimin e dhënë nga Disiplina, që e ka pezulluar me dy ndeshje, ku të parën e shleu ndaj Egnatias.
Edhe pse i lind e drejta e rikthimit duke paguar gjysmën e mbetur të dënimit, gjasat anë që trajneri dhe klubi të mos e paguajnë, në mënyrë që Daja të rikthehet në drejtim ndaj Kastriotit, në qoftë se deri atëherë nuk do të ndryshojë qëndrimi i drejtuesve për të ardhmen e “timonierit” të skuadrës.
Ngjeshja e kalendarit, por edhe rezultatet e dobëta bëjnë që të mos ketë pushim për “demat”, të cilët dje kanë nisur përgatitjet për dy ndeshjet e radhës, nesër luajnë në Kupë ndaj Besëlidhjes në Lezhë, ndërsa në fundjavë ndaj Kastriotit për kampionat.
Java ka nisur me lajme të mira, pasi Ergys Kaçe duket se e ka kaluar dëmtimin dhe dje u përgatit me ekipin. I mbetet stafit dhe vetë lojtarit për të vendosur për aktivizimin e tij, ku në Lezhë nuk pritet të rrezikojë, në mënyrë që të jetë plotësisht gati për krutanët.
Ndaj Egnatias, Partizani pati një mungesë me peshë në sulm, pasi Junior ishte i pezulluar nga kartonët, kështu që braziliani rikthehet me shpresën që të bëjë diferencën në sulm.
