Ilir Daja pritet të jetë në fundjavë në pankinë në ndeshjen e Partizanit në transfertë kundër Kastriotit. Trajneri kryeqytetas shlyen dënimin e Disiplinës ku u pezullua për dy takime, me sfidën e nesërme në Kupën e Shqipërisë kundër Besëlidhjes. Deri më tani fati ka qenë kundër 55-vjeçarit, ku ç’është e vërteta ka sjellë tek të kuqtë një lojë të mrekullueshme.
Rezultatet flasin kundër tij, megjithatë të gjithë janë koshientë se kryeqytetasit asnjëherë s’kanë luajtur në këtë mënyrë duke prodhuar spektakël në fushë. Sakaq në fundjavë mund të rikthehen në tribuna edhe tifozët. Këta të fundit u dënuan nga organi i drejtësisë sportive me 4 ndeshje pezullim.
Por, pas sfidës së Kupës, drejtuesve të kuq u lind e drejta ta shlyejnë pjesën tjetër të dënimit duke e paguar. Pritet me interes të shihet se çdo të ndodhë, ndërsa s’përjashtohet mundësia që Ilir Daja ta paguajë vetë dënimin e mbetur dhe të jetë që nesër në pankinë në sfidën e turit të dytë kundër Besëlidhjes.
