Kreu i PD Lulzim Basha, ka përcjellë sot për në banesën e fundit babin e tij Xhelal Basha, i cili u nda nga jeta dy ditë më parë.
Me anë të një postimi në Facebook, Basha falenderon miqtë de të afërmit që ju gjetën pranë në këtë moment të rëndë për të dhe familjen e tij.
ndërkohë falenderon edhe mjekët për përkujdesjen e madhe që treguan për babain e tij gjatë kohës që luftonte me sëmundjen e rëndë.
Postimi i Bashës:
Sot i dhamë lamtumirën babait tim Xhelalit i cili u nda nga kjo jetë pas një beteje të gjatë, duke na hidhëruar dhe ligështuar mamanë time Remzijen, mua dhe vëllain tim Erlindin, Aurelën, vajzat, familjarët dhe miqtë e shumtë të tij dhe familjes. Ai u largua në paqe i rrethuar nga dashuria dhe përkujdesi i njerëzve të tij të dashur.
Në këto momente dhimbje të rëndë për familjen tonë, falenderojmë me mirënjohjen më të thellë të gjithë miqtë dhe dashamirët që na u gjendën dhe na lehtësuan, me praninë, mendimet, mesazhet, lutjet dhe mbështetjen e tyre.
Falenderojmë mjekët, infermierët dhe të gjithë personelin shëndetësor për përkujdesjen e tyre të dhembshur për babain gjatë gjithë kësaj periudhe.
Për familjen tonë kjo është një humbje e madhe. Por po kaq i madh është ngushëllimi që Zoti e mori me qetësinë dhe dinjitetin që i fali në çdo çast të jetës së tij, si dhe lutjet tona që shpirti ti prehet në paqe!
