Detaje të reja janë zbuluar në lidhje me gardistin që u plagos në këmbë me armën e shërbimit mëngjesin e sotëm.
Ai ka reaguar për herë të parë nga spitali i Durrësit, ku ka dhënë përpara grupit hetimor detajet se si ndodhi ngjarja.
Në dëshminë e tij, 29-vjeçari thotë se është vetë-plagosur aksidentalisht me armën e shërbimit, ndërkohë që ka mohuar të ketë pasur përplasje me persona të tjerë.
“Nuk ka asnjë ngjarje apo përplasje me persona të tjerë. U vetë-plagosa me armën e shërbimit, e cila në një moment u shkrepa pa dashje dhe plumbi më kapi në këmbë. Njerëzit e mi më sollën në spital, kjo është e gjitha.”-ka deklaruar gardisti.
Punonjësi Gardës së Republikës ka marrë mjekimin e nevojshëm në urgjencën e spitalit, ndërsa më pas është marrë në pyetje nga oficerët e policisë. Burime nga grupi hetimor pohojnë se e kanë klasifikuar ngjarjen si “vetëplagosje nga pakujdesia”, por që do të hetohet edhe mundësia e përfshirjes në konflikt me një person tjetër.
Njoftimi i Policisë:
Në Spitalin Rajonal Durrës është paraqitur për ndihmë mjekësore shtetasi M. G., 29 vjeç, punonjës i Gardës së Republikës, i cili është dëmtuar aksidentalisht në këmbë me armën e shërbimit. Aktualisht ndodhet jashtë rrezikut për jetën. Materialet kaluan në Prokurorinë e Rrethit Gjyqësor Durrës, për veprime të mëtejshme.
