Gazetarja, Anila Hoxha ka zbuluar detaje të ekzekutimit të ish policit Xhelal Reçi në Laç.
Në emisionin “Open”, Anila Hoxha tregoi se pranë viktimës ishte gruaja, e cila po ndizte dritat e biznesit. Gazetarja tregoi se prokuroria e ka përjashtuar pistën që vrasja të ketë ndodhur për shkak të detyrës që ka mbajtur si polic vite më parë Reçi. Ndërkaq, dy djemtë e viktimës dyshohet se kanë pasur problem me persona të njohur në zonë dhe kjo është pista kryesore ku po heton policia.
Anila Hoxha: Kjo është vrasja e 55-të që prej 1 janarit. Mes vrasjeve të mirëorganizuara dhe kryesisht për motive droge, është vrasja e 15-të e pazbardhur, e Xhelal Reçit që ka qenë efektiv i policisë rrugore.
Prokuroria dhe policia lokale e përjashtoi mundësinë e një vrasje me detyrën që ka ushtruar. Siç thuhet, automjeti i vrasësve dyshohet se është vjedhur në fshatin Mbrostar të Fierit me targa greke. Një muaj më parë është denoncuar si i vjedhur. Vazhdon e njëjta skemë, vidhet automjeti dhe targa.
