Në Kosovë janë regjistruar të Hënën pesë raste të reja me koronavirus nga 1.115 testime.
Gjatë 24 orëve të fundit, nuk është regjistruar asnjë viktimë. Që nga muaji Mars i vitit 2020, nga COVID-19 kanë vdekur 2.977 persona.
Nga sëmundja janë shëruar edhe 14 pacientë, ndërsa raste aktive janë 430.
Vaksinimi kundër koronavirusit në Kosovë ka filluar në mars të këtij viti. Gjithsej janë administruar mbi 1.5 milion vaksina.
Shërbimi Spitalor Klinik Universitar i Kosovës ka njoftuar të Hënën se 67 pacientë me COVID-19 janë të shtruar në klinika dhe spitale, prej të cilëve 33 po trajtohen me oksigjeno-terapi, ndërsa 3 pacientë janë në kujdes intensiv.
