Reindalo Kalari ka qenë edhe sot në rolin e trajnerit të Partizanit, për shkak të mungesës së Ilir Dajës për shkak pezullimi. Në fund të sfidës, ish-mbrojtësi ka shpjeguar për ”SuperSport” se çfarë situate po përjetohet në klubin e kuq ku si asnjëherë më parë nuk është gjetur fitorja pas 7 javësh kampionat.
“Ishim përgatitur që sot ishte pika e kthesës sa i përket rezultateve pozitive dhe fitores, por për fatin tonë të keq si gjithmonë e nisim ndeshjen në disavantazh. Për fat të keq. U munduam të rikuperojmë, patëm raste, të shumta si gjithmonë, provuam të gjithë alternativat që kishim në repartin e sulmit por nuk shfrytëzuam rastet siç duhet dhe përfundimin e dini të gjithë.
Në momentin që pësuam golin e pamë që diçka nuk shkonte dhe ndryshuam skemën. Por kësaj mbetet për t’u parë në vazhdimësi se si do të shkojë situata, se si do të vendosi apo si do të luajmë në ndeshjet e tjera.
Të them të drejtën lojtarët janë stërvitur maksimalisht gjatë gjithë kësaj periudhe që kur ka filluar kampionati, në të gjitha ndeshjet kanë dhënë gjithçka, janë munduar që të dalin nga situatat e vështira ku kanë qenë në ndeshjet e kaluara. Pak rëndësi ka kjo pjesë e lojës, në përgjithësi i kemi dominuar kundërshtarët përveç një pjese me Kukësin. Nuk kemi pasur ndonjë gjë që të mbetet pishman nga maksimumi i lojtarëve se kanë dhënë gjithçka, edhe sot kanë dhënë gjithçka për të fituar ndeshjen, por kur është në ngërç psikologjik, për fat të keq shumë ndeshje i kemi nisur 0-1. Vështirësia psikologjike sa vjen e rritet dhe për lojtarët bëhet e vështirë me kalimin e ndeshjeve dhe minutave, si deri më sot. Lojtarët do të vazhdojnë të japin maksimumin se ato janë aktorët kryesorë në fushë, do të jemi të gjithë bashkë që do të nxjerrim skuadrën nga kjo situatë e vështirë, edhe pse është fillimi i kampionatit dhe nuk ka kaluar as çereku i ndeshjeve.
Derisa skuadra i përgjigjet ideve të trajnerit, nuk shoh mosrakordim mes tyre dhe stafit teknik, pastaj te rezultatet është kjo që nisim ndeshjet në disavantazh dhe duke pasur këtë që na shoqëron gjatë gjithë kohës, bëhet akoma më e vështirë. Nuk jam dakord se lojtarët kanë dhënë maksimumin dhe i janë përgjigjur në maksimum ideve e strategjive të ndeshjeve.
Derbi me Egnatian? Duke pasur parasysh që para kësaj ndeshje ishte derbi që me sa di unë është i vetmi, e përdora këtë fjalë në thonjëza për situatën ku ndodhemi, një situatë që të na motivonte më shumë për të qenë ku na takon. Derbi kaloi si kaloi dhe thashë që derbi jonë është Egnatia, jo që është me Egnatian. E thashë në aspektin e motivimit dhe atë që duhej të jepnim sot për të fituar ndeshjen që mendonim se do të ishte pika e kthesës.
Partizani nuk ka vdekur dhe të gjithë jemi këtu të marrim përsipër përgjegjësitë dhe do të vazhdojmë të marrim përgjegjësitë e të japim makslmumin tonë që të nxjerrim nga kjo situatë Partizanin, Se ne jemi me ata, bashkë me lojtarët, që mund ta nxjerrim. Jam i bindur që do ta nxjerrim, nuk diskutohet fare”, tha Kalari.
