Një sasi prej 145 kg kanabis u sekuestrua nga policia, që arrestoi kryeplakun e fshatit “Noja” në Krujë dhe shpalli në kërkim një tjeter person.
“Strukturat e DVP Durrës dhe shërbimet e Komisariatit të Policisë Krujë, në bashkëpunim me strukturat e SHÇBA-së, bazuar në informacionet e siguruara në rrugë policore, finalizuan operacionin policor të koduar ‘Noja’, në kuadër të të cilit u arrestua në flagrancë shtetasi: Haxhi Murati, 66 vjeç, banues në fshatin Nojë, Krujë, me detyrë kryeplak i fshatit Nojë, për veprat penale ‘Shpërdorim detyre’ dhe ‘Prodhimi dhe shitja e narkotikëve’. Gjithashtu u bë shpallja në kërkim e shtetasit Bujar Sefa (Xaka), 34 vjeç, banues në Nojë, Krujë, për veprat penale ‘Prodhimi dhe shitja e narkotikëve’ dhe ‘Armëmbajtje pa leje’”, njoftoi policia.
Shërbimet e Policisë, gjatë kontrollit të ushtruar në banesat e tyre, gjetën dhe sekuestruan në cilësinë e provës materiale një sasi prej 145 kg lëndë narkotike cannabis sativa, gati për shitje, si dhe municion luftarak, shtuan të njëjtat burime.
“Vijon puna për dokumentimin e plotë të kësaj veprimtarie kriminale dhe kapjen e shtetasit të shpallur në kërkim, ndërsa materialet i kaluan Prokurorisë së Rrethit Gjyqësor Krujë, për veprime të mëtejshme”, thuhet më tej në njoftimin e policisë.
I shpalluri në kërkim
I shpalluri në kërkim Bujar Sefa (Xaka) është një emër i njohur për drejtësinë italiane. Sefa është dënuar në Itali me 12 vjet e 9 muaj burg dhe i janë konfirskuar një pasuri me vlerë deri në 346 mijë euro. Sipas akuzës, ai ishte drejtuesi dhe organizatori i një grupi trafikantësh dhe tregtarësh të drogës në Itali.
Në bashkëpunim me vëllezërit e tij, Sefa organizonte punën dhe shpërndante drogë nga Holanda në Itali. Ai është në kërkim edhe nga autoritetet italiane. Të dënuar për drogë edhe 2 vëllezërit e tij, Islam dhe Jetmir Sefa. Ndërkohë, vëllai i tij tjetër, Hajdar Sefa, është arrestuar si pjesë e bandës së grabitësve ‘Babagjyshat’.
